Deaf Gathering Cymru: Iechyd Byddar Cymru

Mynd i’r afael ag anghydraddoldebau iechyd er budd ac ar y cyd â chymunedau byddar sy’n defnyddio Iaith Arwyddion Prydain (BSL) yng Nghymru

Mae mwy na 4,000 o bobl yng Nghymru yn defnyddio Iaith Arwyddion Prydain (BSL) fel eu hunig iaith neu eu dewis iaith. Eto i gyd, maent yn wynebu anfanteision iechyd parhaus. Mae’r anfanteision hyn yn cynnwys gwasanaethau dehongli anghyson, cyfathrebu gwael mewn lleoliadau gofal iechyd (gan arwain at gamddiagnosis a thanddiagnosis), cyfraddau uwch o broblemau iechyd meddwl, a mynediad cyfyngedig at adnoddau awyr agored ac adnoddau llesiant ar gyfer y gymuned fyddar.

Prosiect rhyngddisgyblaethol sy’n werth £1.04 miliwn a gaiff ei arwain gan Brifysgol Bangor mewn partneriaeth â Phrifysgol Abertawe, Iechyd Cyhoeddus Cymru a sefydliadau byddar ledled Cymru yw Iechyd Byddar Cymru.

Mae’r prosiect yn dwyn ynghyd arbenigwyr mewn iaith a chyfathrebu, iechyd meddwl pobl fyddar, gwasanaethau dehongli, y gyfraith a hawliau dynol, a mynediad amgylcheddol. Gyda’r gymuned fyddar, byddant yn cydlunio ac yn gwerthuso atebion a arweinir gan y gymuned er mwyn gwella canlyniadau iechyd a mynediad at wasanaethau.

Mae mentrau hollbwysig yn cynnwys:

• datblygu hwb adnoddau a geiriadur jargon meddygol ar-lein ar gyfer dehonglwyr a darparwyr gwasanaethau.
• creu apiau â fideos cyfarwyddol ar gyfer parciau cenedlaethol a llwybrau arfordirol i hyrwyddo llesiant i bobl fyddar.
• gweithio gyda’r GIG a byrddau iechyd i wella cyfathrebu, darpariaethau dehongli a gofal cyfartal i bobl fyddar yn ystod pob cam o’r ddarpariaeth gwasanaethau iechyd.

Pam y dylech gymryd rhan?

Trwy gymryd rhan yn ein prosiect, byddwch yn helpu i sicrhau bod pobl fyddar yng Nghymru yn cael yr hawliau a haeddant mewn perthynas â chyfathrebu a mynediad at wasanaethau iechyd. Bydd eich cymorth yn helpu i droi ymchwil yn newid go iawn, gan leihau anghydraddoldebau, gwella llesiant corfforol a meddyliol, a grymuso’r gymuned fyddar i arwain y newid.

I gael rhagor o wybodaeth, ewch i www.deafhealth.wales.