Zhuo Mengting and Andrej Bako: Sine Surge

Rhaglen ddeuddydd o ddawns a symudiad estynedig yw Reciprocal Gestures: symudiad mewn deialog, sy’n cynnull artistiaid a chymunedau i archwilio potensial cynhaliol a thrawsnewidiol arferion ar sail symudiad.

Gwaith-ar-waith newydd gan Andrej Bako a Zhuo Mengting yw Sine Surge, sy’n dod â sain electro-acwstig a symudiad at ei gilydd drwy rannu system o osgiladiad.Mae seinydd tŷ, meicroffon a llinyn yn hongian yn ffurfio system fregus o ddirgryniad, adborth ac ymateb, wedi’u hysgogi gan y corff mewn gofod. Mae’r gwaith yn cymharu tonnau sin a symudiad llanw, gan archwilio sut mae grymoedd ailadroddus yn casglu, yn cronni, yn symud, yn arnofio ac yn diflannu.

Ar gyfer Reciprocal Gestures, bydd yr artistiaid yn cyflwyno’r prosiect fel deialog rhwng dau arfer dan arweiniad symudiad, gan ofyn sut gall sain symud, sut gall symudiad wrando, a sut mae cyrff yn trin grymoedd y tu hwnt i reolaeth lawn.

___

Ynglŷn â'r artistiaid

Mae Zhuo Mengting (g. Guangzhou, Tsieina, 1990) yn cyfansoddi sefyllfaoedd gyda safle, sain, corff ac amser, ar ffurf perfformiad, gosodwaith cyfranogol, a chyngherddau. Yn aml yn finimalaidd, yn gynnil ac yn agos-atoch, mae ei gwaith yn gwahodd y gynulleidfa i ymchwilio i themâu cysylltiad, trosglwyddo, amodoldeb, a phellter. Yn sonig, mae hi’n archwilio gwleidyddiaeth gwrando – creu, derbyn a thrin signalau – yn ogystal â’r pwyntiau trothwyol lle mae sain a gofod yn croestorri, drwy gyfres o ddigwyddiadau gan ddefnyddio pethau nad ydynt yn offerynnau, sŵn di-eisiau, gwrthrychau a ganfuwyd a’r corff. Datblygwyd sgoriau diweddar ar gyfer MAO Torino, yr Eidal, Frieze Llundain, a Cafe OTO Llundain.

Mae Andrej Bako (g. Caerdydd) yn artist sain yn Llundain sydd â gwreiddiau yng Ngwlad Groeg, Slofacia a Chymru. Drwy osodwaith, gwaith safle-benodol a pherfformiadau, mae’n ymchwilio i syniadau o gof diwylliannol casgliadol, ymreolaeth ddynol, a’n heffaith ar fyd natur, gan wahodd y gynulleidfa i greu cysylltiadau newydd â’r hyn sydd heb ei glywed; y rhythm cynnil a’r synau a ddatgelir yn ein hamgylchedd. Mae’n defnyddio electroneg gliniadur, synthesis modiwlaidd, a recordiadau maes i gyfansoddi seinweddau cywrain, gan gyfuno technegau algorithmig a chynhyrchiol ochr yn ochr â dylanwadau cerddorol tecno a dyb Detroit y nawdegau.