In a thread of air

Mae Chapter yn falch o gyflwyno arddangosfa unigol gyntaf Imogen Stidworthy yng ngwledydd Prydain ers dros ddegawd.  Mae In a thread of air yn cyflwyno gosodwaith newydd, a gyd-gomisiynwyd gan Chapter ac Oriel Matt’s yn Llundain, yn ogystal â thri gosodwaith cysylltiedig a ffilm fer.

Ers dros ddeng mlynedd ar hugain, mae arfer Stidworthy yn edrych ar wahanol ffurfiau ar leisio, drwy osodwaith, sain, cerflunwaith a ffotograffiaeth. Mae ei gwaith yn datblygu drwy ddeialogau hirdymor gyda phobl sy’n ymgorffori gwahanol ffyrdd o fod. Mae’n gofyn sut mae cyfathrebu geiriol a di-eiriol yn siapio ein perthnasau cymdeithasol, ein profiadau, a’r ffordd rydyn ni’n gwneud synnwyr o bethau. Mae ei gwaith yn myfyrio ynghylch beth mae’n ei olygu i fod â llais, a beth mae’n ei olygu i wrando.  

Yn yr arddangosfa yma, rydyn ni’n profi cyfnewid geiriau a llif cyfathrebu rhwng pobl awtistig sydd heb arfer o siarad. Rydyn ni’n ymgysylltu â phobl sy’n siarad o gyflyrau wedi’u newid, mewn gofodau o drawsnewid rhwng un realiti a’r llall, wedi’u siapio gan newidiadau sydyn a phendant yn y corff neu’r meddwl. Rydyn ni’n cwrdd â nhw mewn deliriwm, mewn seicosis, neu ar y llwybr araf a gwydn at iachâd ar ôl digwyddiad iechyd mawr.  

Mae gwaith gofodol a cherfluniol Stidworthy yn ein gwahodd ni i ystyried sut, drwy wrando ar eraill mewn ystyr ehangach – gair llafar, ynganiadau sonig, cyweiriau somatig o ystum a symudiad, dirgryniadau, amleddau a rhythmau anniriaethol – y gallwn hefyd wrando ar ein hunain, gan archwilio sut caiff ein cyfathrebu a’n modd ni o greu ystyr ei effeithio, ei herio, a’i newid drwy addasu i wahanol fathau o fynegiant. 

___

Ynglŷn â'r artist

Artist sy’n byw yn Lerpwl yw Imogen Stidworthy. 

Mae ei gwaith wedi cael ei arddangos mewn arddangosfeydd nodedig, gan gynnwys The Myth of Normal yn Hannover Kunstverein a Salzburger Kunstverein (2024); Survival Kit 11, LCCA, Riga (2020), Bergen Assembly (2019, 2013), Gŵyl Ddwyflynyddol Suzhou (2016), Sioe Gelf Brydeinig 8 (2016–17), Gŵyl Ddwyflynyddol São Paulo (2014), Gŵyl Ddwyflynyddol Busan (2012), a Documenta 12, Kassel, yr Almaen (2007). 

Mae hi hefyd wedi cyflwyno arddangosfeydd unigol yn Oriel Akinci, Amsterdam (2025, 2013, 2009, 2005); Amgueddfa Dr Guislain, Gent, Gwlad Belg (2022); Netwerk, Aalst, Gwlad Belg (2019); Württembergischer Kunstverein, Stuttgart, yr Almaen (2018); Yr Amgueddfa Ryfel Ymerodrol, Llundain (2015); ac Oriel Matt’s, Llundain (2011, 2003).